發願學古文

發願學古文 每年必有一次，就係平時唔睇通勝、唔識睇通勝嘅朋友追問左丁山，今日年初一嘅出門方向及拜年吉時。其實自己打開通勝一睇，就會知道，不過既然朋友問到，唯有照抄一次，以示應景。 今日係年初一壬寅日，吉時由子時開始（即昨晚十一點起計，子丑寅卯辰巳午時皆吉，至中午一點為止），故此年三十晚玩到夠，打牌行年宵之後，今朝九點幾起身，十一時至一時出門拜年，最好不過。出門方向，貴神正東，吉門在正西、正北與西北，正南勿向。下午一至五時係凶時，不宜出行。當然亦有事實困難嘅，譬如左丁山住宅大門就係向正南，難道不出門乎？ 一本厚通勝，有好多古文可讀，譬如蔡伯勵編纂嘅「永經堂」通勝，就附載千字文、百家姓、增廣賢文、三字經、孝經、雜家一覽等等，早前有傳媒報導，一間學校教幼童讀三字經，據講極受歡迎，可能係人心復古，驚住子女唔識中文之故，在家湊孫、湊仔女者，大可揸住本通勝教三字經，慳番一大筆學費！ 但係讀上述文字，要有啲古文根底，在中學未讀過古文嘅，會力有所不逮，唔識教。近日教育局正式宣佈咗明年四月起在中學重開文言文教學，選十七篇古文為範文，要學生熟讀。讀文言文嘅要害，係背書，識背嘞，就會慢慢了解其真義，領略其意境，以後成世都記得。沙田馬會凱旋廳以前有大屏風，上書「永和九年，歲在癸丑，暮春之初，會於稽山陰之蘭亭……」小學程度之80歲阿婆一見就識背埋落去，但佢兩個在中文大學讀書嘅孫，就要旁人解釋先至知道係王羲之「蘭亭集序」，此屏風多年前已搬往四樓Double Haven側門。 左丁山呢輩人，中二就俾老師強逼背誦「古文觀止」之李華「弔古戰場文」，對教育局重推文言文，自然舉腳贊成，估唔到大公報素以「蘋果」為敵，竟亦因此在關昭「井水集」咁樣寫：「亂港傳媒『蘋果日報』昨日刊出一文：題為『文言文百利無一害』」作者為筆名沙膽虹的總編輯張劍虹，是篇好文章（一月二十五日）……」之後大量引用沙膽虹之文字，關昭讚沙膽虹，罕見又罕見，可見文人無不重視古文也。

文言文百利無一害

沙膽虹手記： 文言文百利無一害 教育局最快明年4月起，在中文科重新引入文言文範文，首已選定了17篇，沙膽虹對此深表贊成，或許有些人憂慮恢復文言文範文，會令學生背誦文化重現，但其實這根本不用擔心，即使如此，對學生也是有百利而無一害，背誦後今天雖有不完全明白，但文言文在腦海中沉澱一段時間後，日後有用時就會跑出來，有提高學生中文能力之效。 範文之中，沙膽虹讀書時亦讀過九成，當中較喜歡范仲淹的〈岳陽樓記〉、蘇軾的〈赤壁懷古〉和諸葛亮的〈出師表〉，偶然還有重溫和背誦。除了這17篇外，沙膽虹建議加入王勃的〈滕王閣序〉、白居易的〈長恨歌〉或〈琵琶行〉、歐陽修的〈醉翁亭記〉和曹丕的〈典論論文〉。〈滕王閣序〉所用的四字語句：物華天寶、人傑地靈、高朋滿座、萍水相逢等等，中學生多背誦對語文絕對有裨益。其他的不多說了，請各位讀者自行閱讀。 沙膽虹