務實選科

上星期某個晚上，走回新亞書院一行，見到不少同學已組成不同小隊，分穿紫、紅、黃、藍等不同顏色T恤，練習叫口號，想來必是預備迎新。8月9日各大學宣佈了招生結果，收到入學通知嘅學生當然歡喜萬分，入唔到嘅，一時為之氣餒，此乃每年八月中一定發生之事，各位應屆文憑試學生最好睇開啲，入到大學第一個志願嘅，恭喜晒，入唔到嘅，咪以「艱險我奮進，困乏我多情」嚟鼓勵自己囉。秘書L嘅表妹三年前係沙田某名校嘅高材生，以為必入中大港大，點知高考失手，八大不入，唯有讀副學士，讀咗兩年畢業，以成績接駁入咗一間英國大學，呢，今年九月返嚟香港入港大，將來搵工，邊度有僱主理會佢高考成績吖。 但未來僱主會好理會畢業生讀過乜嘢科目噃，反為主科只作參考。根據美國CNBC電視搵到嘅勞工統計局（BLS）數字顯示，2012年有284,000個美國大學畢業生只能搵到最低工資嘅工作，已比2010年嘅327,000人為少，但比十年前（2002）大增70%，即係話美國依家有好多受過大學教育嘅酒吧酒保與餐廳侍應。 讀完四年大學而只能做侍應，讀嚟做乜？中國方面，每年有七百萬個大學畢業生，相當於香港人口，今年係史上最難搵工一年。如果四年後畢業想搵到工，今年嘅大學新鮮人要在九月初選科時選修一啲乜嘢科目？ CNBC訪問咗一位在藥廠負責請人多年嘅男士，問佢點樣輔導三位女兒（分別主修化學、傳播及公共政策），呢位男士話：「要佢地選修公開演講（Public Speaking）或戲劇（Theatre）兩科，結果現在三個都搵到好工！」 CNBC再訪問不同業界人士，得出一個結論，請大學生無論主修人類學、化學、歷史、數學也好，讀四年大學要必定選修下列五大科目：（一）STEM，即理科、科技、工程與數學有關科目，學會整理數據，像科學家與工程師般理性邏輯思考；（二）商科與經濟，學識現代商業社會之基本運作模式及道理；（三）舞台演戲技巧，識如何發言說話，唔怕醜，將來做演述（presentation）好重要，此中包括Public Speaking、Debate（辯論）在內；（四）專業寫作Professional Writing，在香港嚟講，即是中英文作文俱佳；（五）參加領袖訓練活動；（六）爭取實習機會。各位2013年新鮮人，請注意及之。 昨日所講之大學搵工科目，乃係CNBC調查報導之美國情況，美國人民好現實，覺得四年大學教育費用昂貴，中產學生為咗上學，負債甚多，據統計，美國大學生負債已經超過一萬億美元，好多學生還債還唔起，已成為美國金融機構一個「計時炸彈」，連奧巴馬總統都要在國防外交、就業及保健法案之外，還要為學生貸款（Student Loans）絞腦汁。既然學生家長皆辛苦，現在有五成美國人認為四年大學不是一個好的財務投資。 既然如此，學生在大學選修甚麼科目就好重要，唔好淨係講理想。一位校友之女有年青人之夢，入咗長春藤大學讀環境管理，畢業後搵工困難，現只能在紐約做公園管理，薪水不談也罷。入茱利亞音樂學院唔係可以一定做到曼奴軒，入藝術系唔會一定做到畢加索，總之在理想科目之外，大學生不妨「庸俗少少」，趁有四年（好彩依家係四年制），在主修科以外選修一啲昨日本欄講過嘅科目。 以本港情況而言，因中學生大多係理科生，對STEM科目應該唔會陌生，最宜選修商業統計，財務分析，中英文課程，大學應向全校學生開設中英兩文三語Public Speaking嘅科目，課餘參加戲劇學會、辯論學會、系會、學生會及國際組織（如AIESEC）等，以訓練溝通能力。 本港文科生就比較麻煩，因在中學未修讀理科，在大學選修STEM有實際上困難，兼且恐怕修讀一科數學就會拉低GPA，心理上有恐懼，確係驚啲，大學啲課程編排專家應該要為文學院、社會科學院學生着想，為佢地設計一啲不必與理學院商學院一齊修讀嘅STEM課程。 左丁山一大班中環朋友在大學時各自修讀不同科目，現在回顧以往，主修科只記得大概，搵食絕招，賴以升級嘅，還是中英文及得把口，識講嘢及識計數。新亞校董賓架W以前返中大做Campus Interview，發覺好多師弟妹嘅表現技巧有改善空間（嗱，冇上台演戲經驗吖嘛，中大應開設Theatre課程），於是索性自己掏腰包捐錢俾新亞，每年辦一個Presentation Workshop，請倫敦一級訓練專家到新亞主持工作坊，新亞挑選出嚟嘅三四十名學生參加，幾年來成績幾好噃，可惜新亞仍然係相對嚟講「手空空」，無財力大搞。 左丁山

學習說話

學習說話 上星期講起美國一啲「搵工專家」建議學生在大學時修讀一科「戲劇」（Theatre），學習說話藝術及如何表現自己，為他日進入社會做準備，如果唔讀呢科，都要選修Public Speaking學習演說技巧。 呢日在藝術中心（Arts Centre）包兆龍畫廊參觀學生攝影，遇到新亞師妹魏綺珊，佢係主修新聞系嘅出名靚女主播，現在任職於鳳凰衞視，又在數碼廣播電台主持一個戲劇節目。見到佢就想起大學生在校應修讀「戲劇」，魏綺珊在校時就係戲劇發燒友，現時與友人合組「糊塗戲班」，經常登台演出，記得佢在2009年為新亞創校六十周年紀念登台演出，有一幕由佢獨白近五分鐘，全場觀眾聽到動容，如果人人都有佢一半嘅功力，對面試、演述、演講呢啲職場難關，一定輕鬆通過。諗諗吓，大學嘅EMBA課程應該搵魏綺珊呢類戲劇高手為學生開工作坊，為期一至兩日，啲EMBA一定得益匪淺。 並非人人都可以念對白念到魏綺珊咁一流嘅，退而思其次，在大學參加過辯論隊，或者上過「公開演講」Public Speaking嘅學生，亦大有裨益。肥仔Ｋ去美國讀社區學院之前，根本不知演述（presentation）為何物，但誤打誤撞之下，在學院修了一科Speech，一班得十零人，教師係美籍華人，每日要佢地逐個企起身發言幾分鐘，指導技術，改正發音，如何聚焦及擊中要害等等，一個學期下來，居然可以演講十幾分鐘噃，今天在香港搵到份工，經常代表公司向公眾及行家演述，都係靠把口搵食箒，佢係主修政治嘅，根本無人理會。 近年冒起嘅股壇名嘴涂國彬（新亞經濟2000年），上電視電台講股票，姑勿論是否一定估中走勢，佢嘅口才的確係幾好，隨時企起身都可以講番十幾分鐘，暢順之至，做節目可以一take過，問佢點樣練成這番工夫？佢話過去在新亞讀經濟分析時，已諗住做呢行，特登走去黎文卓、林超榮、阿寬等主辦嘅編劇訓練班學習，學寫劇本、笑話、旁述，又向佢地偷師，學足成年，於是依家一聲話開咪箒，佢嘅腦海已經編好「講股劇本」衝口而出，唔會食螺絲。唔怪得佢年前結婚，請埋林超榮上台致詞啦。

利字當頭：四個必贏的人生策略

利字當頭：四個必贏的人生策略 每年一月初，健身室總是人頭湧湧。無他。許下了新年願望的人，在起初的一百幾十天，總會最落力。但要持之以恒，不可以單靠意志力。強迫自己做不喜歡的事，最終我們還是會放棄；建立一套成功的習慣，才可以在不知不覺間，讓生活去塑造自己。其實除了體形和健康，財富和事業，甚至知識和智慧，道理都是一樣：「勉強冇幸福」。大多數成功的人，都是從生活紀律中，點點滴滴地累積成就。 一，財富。儲蓄，在任何日子都不會錯，當然選擇對的工作對儲蓄的結果有一定的分別。可是大多數人的概念中：「收入－開支＝儲蓄」。由2014年起，大家可以將概念倒轉，每個月出糧之後，先將儲蓄扣起，餘下的才用來消費：「收入－儲蓄＝開支」。有錢在手，才去學怎樣投資也不遲。相反，沒有理財紀律，許多人發了橫財，幾年間就打回原形。 二，生活。作息和飲食定時，是一切改變的起點。當年Claude Hopkins推銷牙膏，全世界都未有每天早晚擦牙的習慣；這個天才想到了將起床和就寢，這兩個每天必然發生的事和清潔牙齒掛鈎，Viola！幾十億人如此多了兩個每日必然會做的事。將希望建立的新習慣，掛鈎在舊的習慣，是一個簡單而有效的人生策略。 三，記錄。我們大多數人，都不知道自己有甚麼習慣。將自己每天所做的事記低，可以幫我們分析自己是怎樣過日子。檢視自己的生活，也是一種反省。此外，將未來要發生的事，要記憶的事，統統都寫在日曆上，減少靠腦袋的記憶體，也是一種成功的習慣。當過去和未來都不用費神，我們才可以更集中精神，活在當下。 四，見識。閱讀也好，建立人際網絡也好，總不可能是隨遇而安的事。一年讀多少本書，在甚麼圈子打好關係，任何成就都是先有目標，再找出步驟；有步驟，才知道進度是否合乎預期。做人最緊要有進步。 今天的我，不斷超越昨天的我，這樣才是沒有包袱的人生。